Waibi baru affair

Waibi main skandal

Jalan-jalan cari makan,

Cari makan di tempat orang,

Kalau suda tidak berteman,

Carikan waibi amoi seorang,

Apa kabar peminat2 waibi? Ada sihat ka? Ada bagus ka? Macam lama suda waibi indak menulis ne, rindu pula mau memberi kata perpatah. Waibi yakin memang kompom ramai yang bulat mata tinguk tajuk Waibi ini kali, apa tidak..siok baitu. Tapi jangan kamu salah anggap ya, Waibi cakap hanya la pendapat. Kalau suka, diam-diam, kalau benci pun diam-diam la.

Begini, biar Waibi kasi perkenalkan diri dahulu, Waibi ini tinggi orangnya, berkulit halus berwajah hensem, sekali tengok pasti mo tengok lagi. Pasal Waibi hensembui ini la Waibi mau kasi cerita sama kamurang, cerita Waibi dulu-dulu, kamurang bacala saja ya, jangan pula kamurang sedih kalau baca cerita Waibi ini.

Dulu Waibi seorang kontraktor, Waibi banyak duit sampai berjuta-juta, pigi sana sini pakai BMW kadang-kadang pakai MERC. Aisehmen, biasala Waibi kan, suda kaya bah, mana mo pakai kereta ‘kicai’. Yang tadi Waibi kasi tau itu, yang pasal hensem, AHAHAHAH...Waibi tipu saja ba, manada la Waibi hensem. Suda la kurang hensem, perut boroi, pindik lagi. Mmmmm...itu la nasib Waibi tp ingat, Waibi banyak duit bah.

Waktu itu, bulan MAC, Waibi keluar sama kawan. Pigi lepak di satu tempat hiburan..suda nama pusat hiburan takan la Waibi main katam-katam..adeii..kasi la UP sikit standard Waibi ba. Nah...suda sampai di sana, Waibi order la 2 3 tower, time tidak paning Waibi tidak berani mengontek..tp kalau suda paning Huuuuuuuuuu...pantang Waibi dicabar. Adalah kenen, 3 4 orang sumandak ne duduk di sebelah meja, Pewiiiiiiiiiiittttt..kalau nampak kompom baliur. Kuyak mata kamurang tinguk..seksi, cantek, menawan....

Cukup-cukup la baitu Waibi puji2 dorang, talampau la bah kalau Waibi jek-jek dorang, lagipun bukan dorang kasi Waibi duit. Aiksss..kuar cerita suda ne..mana suda tu??? Oooooo...jadikan..dorang duduk di sebelah meja la ba ini, ada satu orang yang kiut2 ne balik2 tinguk2 Waibi, apa lagi pura2 la Waibi angkat-angkat gelas, kasi SIGNAL sama tu cewek. Fuhhhhhhh.....mantap ba dia ini, body saja...mmmmmm.. kalau dapat....opssss opssss jangan cerita lebih-lebih ndak bagus, Waibi ini orang basar, mana buli cerita yang bukan-bukan. Ok OK sambung lagi, jadikan...kamu mau tahu ka apa Waibi buat? Senang saja ba mo urat dia ini.. begini...

1. Pertama, Waibi angkat galas kasi SIGNAL sama dia...ingat tu arr..yg malu2 mo mengurat tu

2. Waibi isap rokok, kasi tayang gentleman kunun...

3. Waibi berdiri, agak-agak macam posing sekejap...

4. Pastu Waibi jalan la pi meja dorang...

Hebat kan Waibi, berani pi meja dorang. Memang la ba berani, sebabnya manada lelaki yang duduk di meja dorang, kompom la ada harapan...Waibi pigi la dekat-dekat yang balik-balik tinguk Waibi itu. Waibi salam la, “Hi nama saya Waibi” mmm mmm itu la ayat pertama Waibi cakap.. trus dia pun kasi la tau nama dia. Lucu heyyy nama dia ne, sexy, cantek, kiut tapi nama aduiiiiiiiiii......TAR ba. Bingung juga Waibi napa nama dia Tar ne..ahhhh peduli la, kalau namanya apa-apapun, teda perubahan juga ba. Janji Waibi ble kenal kan. Apa lagi, kawan-kawan pun, join la sama semeja. Malam itu, kami minum sama-sama. Nyanyi-nyanyi...punya sedap pula suara c Tar ne.. mula2 malu mo pigang jari..tapi dia yg pi peluk Waibi..AHAHAHAHHA..siok heyy......begitu la cerita tu malamnya...tiada yang berat-berat juga terjadi. Ok kan Waibi, Waibi bukan mo ambik kesempatan pun. Padahal Waibi ini suka tolong orang  bah, malam tu memang la bah Waibi yang hantar dia balik..sampai rumah sewa dia la ba..jahat juga Waibi kalau kasi turun tengah jalan. Nanti kalau kena gigit anjing apa macam, kalau kena culik, kalau kena TARBUS?? Na na Waibi lagi kena soal siasat nanti.

Nah...hari pertama Waibi kenal dia ne, huuuu...malu-malu lagi dia mo minta..Aisssshhh jan kamu salah anggap ya, bukan minta yg ANU-ANU, tapi mintak tolong la bah. Rupa-rupanya dia ini masih belajar bah. Indak paya la ba Waibi mo kasi tau dia study mana, nanti Waibi takut kamurang pi urat dia ne..ehhehe. Dia mintak tolong la sponsor study dia sebab dia cakap orang tua dia susa, lagipun suda tua ndak ble kerja, sakit laa..macam-macam la ba..Waibi ini jenis yang cepat kesian sama orang bah...jadi Waibi janji mo kasi sposor la study dia kenen. Bukan study saja Waibi sponsor, Waibi kasi kereta 1, Waibi kasi kondo 1, waibi kasi salary lagi tiap-tiap bulan. Wahhh...makin lama makin hebat suda dia, makin bergaya ne, pandai pigi SPA,  kasi urut2 badan..cuci kulit..

Lama-lama, perasaan Waibi pun bertukar, daripada hanya membantu terus Waibi jatuh hati suda. Waibi ingat dia  ndak suka waibi, tahu-tahu perasaan dia pun sama. Biarpun umur kami ndak sama sebab dia muda sikit laaa dalam 15 tahun begitu dari Waibi tapi dia akui dengan jujur dia suda anggap Waibi kekasih hatinya..wahhhhhhhhhhhhh kehoiiiiiiiiiiiiiiiiiiiiiiii...punya senang hati Waibi itu time. Macam cerita drama korea tu ba..aduii..

Tanpa melengahkan masa, Waibi ajak dia kawen, yala ba..barang bagus kan...takan la mahu Waibi begelumang dosa pula. Jadi Waibi bawa dia jumpa orang tuanya, betul-betul pula bah cerita yang dia kasi tahu itu. Orang tuanya sudala tua, sakit lagi..sa kesian juga. Sebelum Waibi balik dari kampung dia, ada juga la Waibi kasi 10k sama bapa dia, bikin beli barang dapur bah..kesiannnn......

Nahh..sekarang kami suda kawen. Time kawen ari tu sorry la Waibi ndak terjemput kamurang, lupa ba , tahu-tahu laa...sejak ada bini no 4 ne jadual Waibi makin full.........