Waibi cakap salah..

Waibi akun salah

Suda lama Waibi berfikir, mahu akun salah atau tidak, ada kebaikkan ada keburukkan juga la tindakan Waibi dulu. Begini la, biar Waibi cerita dulu pasal masalah-masalah yang menimpa Waibi dahulu baru la Waibi akun salah ya.

Dulu Waibi ini cuma orang bawahan, kerja pun cari makan dan gaji bulan.  Ikut arahan sama bos, kalau bos bilang A, A lah Waibi buat..dulu susa mo dapat kerja jadi waibi kerja la ikut arahan. Lama-lama Waibi naik pangkat, waibi jadi ketua cawangan. Waibi atur semua orang bawahan, kasi makan cukup-cukup supaya dorang kenyang tidak lari, macam ular sawa bah suda kenyang diam-diam laaa..

Lagi lama, waibi lagi naik pangkat, waibi jadi ketua besar suda tapi belom lagi jadi bos besar la. Begitu la juga Waibi buat, kasi makan, kasi minum apa saja la yang boleh buat orang bawahan senang hati.

Lama-lama, Waibi suda ketagihan dan gila kuasa, Waibi mau jadi BOS besar sekali. Banyak la Waibi buat untuk mendapatkan jawatan itu. Waibi pakat sama orang seberang, Waibi buat komplot dan perjanjian mahu kasi jatuh itu BOS besar sekrang. Akhirnya, Waibi berjaya menjadi BOS BESAR.

AHAHAhahah......senang hati Waibi. Semua dalam gengaman Waibi ketika ini, Waibi suda kuasa semua, sesiapa yang melawan Waibi, abis la Waibi kasi turun pangkat. Semua konco-konco bos besar lama Waibi kasi drop..Waibi lantik orang kanan dan penyokong kuat Waibi pigang jawatan.

Alamaksss..terlupa Waibi sebut, dalam perjanjian tadi, Waibi suda janji kalau Waibi jadi BOS, Waibi mesti;

1. kasi hadiah sama orang seberang 1 buah pulau

2. kasi masuk kontraktor dorang buat kajian dan mengali sumber asli Waibi

3. hasil jualan sumber asli tadi, Waibi dapat 15% saja

4. kasi masuk pasukan sebrang bertapak tempat Waibi

5. dan macam-macam lagi tapi Waibi lupa suda...

Mari Waibi cerita satu persatu tentang perkara di atas,

1.Kasi hadiah orang sebrang 1 buah pulau

Apa yang waibi risau kan, bukan ada emas di pulau itu, bukan ada pun sumber-sumber lain. Biawak sama buaya mungkin la ada. Jadi waktu itu, Waibi tidak terpikir tentang apa yang akan terjadi 20 30 tahun akan datang, jadi Waibi kasi sajalah tu pulau sebagai hadiah lagipun dorang suda tolong Waibi kan. Lama kelamaan, ini pulau jadi pula pusat ekonomi yang membangun, arghhhh..takajut Waibi..kenapa la Waibi tidak terpikir begitu dulu ya. Buta ka Waibi, atau Waibi binggung waktu itu..

2.kasi masuk kontraktor tempat Waibi

Masa Waibi jadi bos, manada syarikat yang berteknologi canggih untuk buat semua itu dulu, kalau ada pun mungkin yang campin buat bangunan saja..cuba kamurang tinguk sanaa..adakan bangunan cantik yg Waibi buat..lagipun biasalah..Waibi pun dapat SAHAM sama itu kontraktor ba..ada juga simpana Waibi. Tapi bila sekrang baru Waibi terpikir, yang kaya orang lain bukan anak tempatan Waibi, kalau kasi sama orang tempatan mengkali ada suda jutawan lahir dari tempat waibi ini. Bangga juga Waibi kan..

3. hasil jualan 15%

Ehehehhe..kamurang tinguk saja 15% tapi kamurang ndak tahu berapa harga sebenarnya, kamurang ingat kecil ka itu 15%. Huuuu kalau setakat tempat Waibi ini cukup suda bah, bikin kasi bangun semua. Kasi belanja semua orang..bikin itu, bikin ini..macam-macam yang Waibi buli bikin..tapi Waibi lupa, semakin lama semakin ramai pula anggota Waibi ini yang beranak pinak..lama-lama indak cukup pula ne 15%. Bah tau-tau la, mahu sambung sana, mahu sambung sini. Cubala masa itu, Waibi yang kasi usaha sendiri ndak ka berbaloi, yang kaya orang Waibi juga, yang senang orang Waibi juga. Skerang apa jadi, susa mau dapat suda ooo...mau kasi up 40%, takut Waibi kena turun pangkat..nanti Waibi kena boikot.

4. kasi masuk pasukan seberang

Dulu-dulu kurang anggota kanan Waibi jadi terpaksa la Waibi bawa masuk pemain import, tolong-tolong Waibi, paham-paham sajala kalau suda berkuasa ini, banyak yang mahu kasi jatuh Waibi. Tapi Waibi tidak takut sebab ada juga BounZEr jaga Waibi ba. Sekali suda lama-lama, aiksss ini bounzer yang pandai kuasa suda ini, pandai suda tidak ikut perintah Waibi. Sekali itu, dia pula yang kasi arahan sama Waibi. Menyesal pun tiada guna, kan bagus kalau Waibi tidak paya import dorang dulu, sendiri kita atur ini, kan senang. Menyesal Waibi bah.

Banyak lagi laa cerita-cerita time Waibi kuasa ini tapi Waibi rasa itu antara isu-isu panas yang sentiasa orang ingat Waibi. Ahahahahah..bukan waibi mengolok kamurang, Waibi tersenyum bah, Waibi tahu Waibi salah tapi kalau Waibi tidak buat begitu apa mcam kita mo membangunkan lagipun banyak orang mo rabut tempat Waibi ini bah..

Apa-apa pun Waibi kesal, akun segala kesalahan, atas segala perbuatan waibi dulu. Ini la bah orang cakap liku-liku kehidupan tiada pengalaman mesti mo cuba kan. Akhir sekali waibi minta maaf atas segala keterlanjuran Waibi dahulu namun fikir-fikirkan la, setiap keburukkan itu ada manfaatnya. I AM SORRY........waibibaru.